jetz halt doch emool de gaul aa
du hettscht am aafang net gedenkt
dass des so lang halte deet
ich hett am aafang ach net gedenkt
dass des so lang halte deet
s erscht hoscht du mich in de lehr ausghalte
dodruff hab ich dich in de määschderschul ausghalte
do hämmer unsern zaschder zammegelecht
do simmer quitt
mir hänn dei schräächie schwichermudder ausghalte
mir hänn mein iwwerzwerche schwichervadder iwwerlebt
do hämmer alle beed zammeghalte
do simmer ach quitt
du hoscht mich un mein rochus ausghalte
ich hab dich un dei muffellaun ausghalte
jo do hett mer als nausgekennt wu kä loch is awwer
do simmer quitt erscht recht
wie ich kenns määh gekennt hab hoscht du mich ghalte
wie du s lääwe lääd warscht hab ich dich ghalte
zum glick
alla do simmer noch emool quitt
un als emool hämmer uns annanner ghalte
annanner richdig feschtgegrabscht gradselääd
des war schää so
doppelt quitt allemool
mir hänn uns zwää doch immer widder vertraache
un mir hänn doch jetz schunn so ewiglang zammeghalte
odder
jo s is doch wohr
un uff äämool dedemer des nimmie
gar nimmie minnanner aushalte
kumm geh fort
des wer doch nix werklich iwwerhaupt gar nix
jetz halt emool de gaul aa
Matthias Zech, 2020