Spruch uffm Kriegerdenkmol in Bockrem
„Die Treue ist das Mark der Ehre“
Dorch Mark un Bää is mir der Spruch
vum Kriegerdenkmol gange.
Druff stahlhart en Soldat: Zeigt nix
vun Zittre, Angscht un Bange,
vun Kobbschiss, Menschefetze, vum
Versticke un Verrecke,
ach nix vun Panzerkette, vum
Verfriere un Verdrecke,
vun Kinnerträne, Mutterhoffe, lang
vermisste Vädder,
vum ausgebombte Hause in
paar zugig dinne Bretter.
Dorch Mark un Bää misst ääm der derre
Satz doch ääzisch gehe,
weil eichentlich misst do e furchtbar
annrie Wohrheit stehe:
„Fer d falsche Fiehrer hämmer domols
all die Kepp hieghalte!
Fer d Falsche warn die Opfer vun
uns Junge un uns Alde!
Die Falsche hänn uns eigebläut, was
Treue sei soll, Ehre!
Fer s Falsche simmer gfalle unner
Salve aus Gewehre!“
Dorch Mark un Bää dut sich des Weh
in Menscheseele bohre,
dann sinn se blind un daab un stumm
un ganz un gar verlore,
un kennen nimme sehe, traun sich
nimmie zu benenne,
was se hot losse in e furchtbar
Hellefeier renne.
Dann werrn die liebschde Doode zu de
allergreschde Helde,
un vun dem Schlimme redd mer dann
norr selde, ach so selde!
Dorch Mark un Bää un dief ins wunde
Herz soll sich neigieße
en helle Friedensbach, un draus
lewendig, mutig fließe
en feschde Wille, alles, alles
bei uns draasesetze,
dass net en neiie Hass, e neiies
Kriegs- un Schlachte-Hetze
uns richte losst schun jetz die grobbe,
groe Denkmolstää
fer n Treu- un Ehre-Spruch, wu beißt un
schneid dorch Mark un Bää.
Matthias Zech, 2020