un die sunn
schpautzt ihr hitz iwwer des
doodgeweihte aus
un de mond
lacht sei gääles däächgsicht geche
allminnanner wu grad do nuffstehnen
un die stern
hassen ihr eichenes leichte
werren blass un blasser un
versteckeln sich vor
angscht dasse unnergehen
un de sichelmann
feiert e riesisches sauffescht
zelebriert im brecherrausche mit de
erzdeifel sei großes hochamt zum
dank fer des weite nasse schlachtfeld
un s stumme graue
part sich mit dem
fraue un kinner gekrisch un
kocht die mensche als noch hääßer
fer zum massakriere
un die haifisch
frääen sich an de abgsoffene
boote danzen seewalzer un
fressen sich fett beim
leicheschmausgaladinner
un s salzwasser
schnappt sich die dausend hoffnunge
spuckt e paar uuverdauliche
plastikschlabbe an de strand wu se die
enkelscher iwwerglicklich in ihr
sandburche eibauen
un die engel
im himmel fliechen uffgerecht
dorchennanner weil de
Liewe Gott schlooft odder
verrääst is odder schun lang dood
un unser Herr Jesus
dut sich aus blanker
verzweiflung mit seine bludische
dornekron widder ans
kreiz zurickhänge wurer an seim
Heilische Geischt verstickt
vun ewigkeit zu ewigkeit
un mir
mir guggen
zu
Matthias Zech, 2017