Fer die Karin Ruppert (21.07.1936 – 26.05.2017)

Noochruf: E schäänie Lewensscheier

 

E aldes Lewe is e großie, vollie Scheier,
gfillt mit Erinnerunge, Leit, lange Gedanke,
mit Sehnsucht, Dood, mit kaltem Eis un hääßem Feier,
mit Hass un Frääd un Opfer, ach so deier,
johrhunnertalt dun sich dodrin die Gschichte ranke.

Dei „Lewensscheierbuch“ dut des so bunt beschreiwe:
Mild melancholisch klingt dein Aafangs-„Häämwehbrief“.
Beim „B’such dehääm“ dut’s dich sehnsichdich dohie treiwe,
wu’d siehscht, wie’s frieher war, un en Geruch dut bleiwe
in deiner Nas verschdeckelt, dief so dief.

„Nooch fuchzisch Johr am Tafelsbrunne“ – net vergesse,
wie’s domols war, als Kind in Speyer, wu die „Nachtigalle
an d’Retscherkerch“ hän triweliert un g’schlugst, hän gsesse
im struwwliche Gebisch. Un wie sich Zwää zum fresse
gern g’hatt hen „Unnerm Keschtebaam“. – En nasser Dalle

war de Bodde dann zum Glick beim „Reche-Brezelfescht“.
Un „Nooch em Urlaub“ packscht e Engelspäckel,
„(…) fer uff Amerika“, packscht’s fer dei Dochter-Allerbescht,
die wu d‘ doch ach so uubeschreiblich gern grad bei der hetscht,
mit Trääne wickelscht s‘ Weihnachtsgutsel zwische Babbedeckel.

In deine Kerch – Dreifaltigkeit – duscht nuff an d‘ „Deckebilder“ gucke,
spierscht, „Was de Moses spiert“, herscht, „Was de Jakob hert“,
de „Abraham“. De „Adam un die Eva“ – dun sich ducke.
De „David“ an de Orchel soll net pienze, schlucke.
Gott sacht: Vum Lewe sing! Des isses, was mei Herz begehrt!

Du, Karin, fiehrscht „Dorch’s Johr“: „Sternsingerle“ singen,
’s is „Lichtmess“, „Friehling“ werd’s, „April“, „Auguscht“,
beklachscht im „Butterblumme-Requiem“ die schlimme Dinge,
wu schaden de Nadur. Loscht „Weihnachte“ so annerscht klinge,
wann d‘ Wiehldisch-Knuddelviecher suche duscht.

In klare Reim‘ un kunschtvoll komponiert‘ Sonette
gehscht mit uns „An de Grenz“: Die „Daachesschau“
werd zu me Uffruf, arme Leit im Krieg zu rette,
en „Alde(r) Hund“ find Ruh im Kerwel, un en nette
Freund dich beim „Klassetreffe“. Was en Zufall! Ja genau!

Was „Angscht“ is, wääscht, willscht weiterlewe „Iwwerm Berch“,
e „Briefel“ schreibscht zum Troscht fer n‘ Kranke.
„Bloo is die Farb‘ vum Glick“, – klingt gar net iwwerzwerch!
Norr neewebei: Du schreibscht ach fer die Kerch
Choräl un Lieder um in Pälzisch, – vielmols danke!

Un danke duscht am End dem „Herr iwwer die Zeit“.
Du warscht in Gott verworzelt lang un dief un fescht.
Ach in meim Herz bleibscht. Wääscht, so viel liewe Leit
frään sich an deine Vers‘, an deine schääne „Lewensscheier“ heit.
Dank, Karin, dir. Ruh sanft! Mir bleiwen noch e bissel drin bei dir dei Gäscht.

 

Anmerkung:
Karin Ruppert hat ein Buch veröffentlicht: Lewensscheier, Gedichte in Pfälzer Mundart, Marsilius Verlag, Speyer, 2. Auflage 1998. Alle oben aufgeführten Zitate beziehen sich auf die Titel dieser Gedichte. Der „Noochruf“ wurde bisher nicht veröffentlicht, auch nicht mündlich bei der Beerdigung.

 

Matthias Zech, 2017