Ich stell mer vor, du bischt net gange
fer immer iwwer d Himmelsbrick,
ich bin net wiescht im Griwwle gfange,
un du kummscht grad zu mer zurick.
Ich stell mer vor, ich du dich kisse
uff d Nasespitz un uff dei Stern,
leicht hoscht dich in mein Arm neigschmisse,
un ich du schbiere, du hoscht s gern.
Ich stell mer vor, du duscht mich kisse
uff s Aach un uff mei kahles Hern,
zart hoscht mer in mei Ohr gebisse,
gern hab ich s ghatt, mein Schatz, so gern.
Ich stell mer vor, ich du dich traache
aus d Kich, die Trepp nuff bis ans Bett,
her mich debei der ganz leis saache:
Ich hab dich gern, mei klennie Klett!
Ich stell mer vor, dei Klääder fallen,
du danscht fer mich, die Hitz bricht aus,
duscht kreische un dich an mich kralle
un juuxe frei dei Frääd durch s Haus.
Ich stell mer vor, du duscht dich kuschle,
dein Kopp verzasselt in meim Arm,
ich du der zart dei Hoor verwuschle,
de Schlof kummt leise, sanft un warm.
Ich stell mer vor, am nägschte Morsche,
schlach d Aache uff, du bischt noch do,
mer dun die Vechel peife horche
un sin uns noh, so aarich noh.
Ich stell mer vor, du bischt net gange
fer immer iwwer d Himmelsbrick,
ich bin net wiescht im Griwwle gfange,
un du kummscht grad zu mer zurick.
Matthias Zech, 2018