du schmunzelscht nimmie iwwer mei alte witz
des is schlimm
mir fallen ach kä neie mää ei
des is noch schlimmer
awwer am schlimmschte is
am allerschlimmschte
lache
zsamme lache
du mer gar nimmie
du rierscht mich nimmie aa
des is traurich
ich derf dich ach nimmie aariehre
des is noch trauricher
awwer am traurigschte is
am allertraurigschte
greine
zsamme greine
du mer gar nimmie
du sagscht mer nix mää vun der
des is eisig
ich will ach nix mää vun der wisse
des is noch eisischer
awwer am eisigschte is
am allereisigschte
verzehle
zsamme verzehle
du mer gar nimmie
du un ich sin zsammegfrohre
un
hoffentlich
hoffentlich dut’s net taue
mir deeden glatt
devunnlaafe
Matthias Zech, 2015